CEBU, Philippines – Gisupak sa mga nasunugan sa Barangay Lahug, Dakbayan sa Sugbo ang pagpabutang og blue guards sa luna.
Matud ni Dioscoro Villas, 55-anyos, nga dili na unya sila pabalikon sa pagtukod sa ila’ng pinuy-anan kung guwardiyahan ang luna subay sa plano ni Atty. Liza Corro, ang Dean sa University of the Philippines nga maoy tag-iya sa luna.
Si Corro nibisita sa mga nasunugan kagahapon diin iya’ng gipakita ang titulo sa yuta nga ang UP ang tag-iya sa luna.
Matud ni Corro nga makigtagbo siya sa mga opisyal sa Barangay Lahug aron pagkab-ot og sulbad sa problema sa mga nasunugan.
Si Corro nisugyot og relocation site alang sa mga biktima sa sunog aron matukuran na nila ang luna nga nasunugan og dugang classrooms.
Matud niya nga 2013 pa lang na-award na nila ang architectural and engineering design apan wala pa ma-materialize ang mao’ng building kay gipuy-an sa mga residente ang luna atbang sa Lahug Barangay Hall.
Ang relocation site nahimutang sa Barangay Busay, Cebu City duol sa GMA-7. Samtang ang mga kawani sa Cebu City Hall ang boluntaryo nga mohatag sa ila’ng hinabang sa mga nasunugan.
Matud ni Acting Mayor Edgardo Labella nga dili lalim ang gibati sa mga biktima sa sunog hinungdan nga ila’ng dad-on ang mga serbisyo sa Cebu City Hall ngadto sa lugar.
Sumala pa ni Labella nga boluntaryo niya’ng giawhag ang mga empleyado sa City Hall pinaagi sa usa ka memorandum nga mopaambit sila sa ila’ng mga grasya nga nadawat.
Gibutyag ni Labella nga laraw gyud nila karon nga matubag sa dinalian ang mga panginahanglan sa nasunugan sama sa reblocking aron usab makabalhin na sa ila’ng kanhi nahimutangan ang mga namakwit sa eskwelahan tungod kay mobalik na usab ang tingklase sa mga bata.
Samtang ang pangulo sa Department of Social Welfare and Services, Dr. Ester Concha, nitug-an sa Banat News nga ila lang una giandam ang financial assistance sa mga biktima sa sunog. – /GMR) (BANAT NEWS)