CEBU, Philippines – Gikasubo sa direktor sa kapulisan sa Police Regional Office-7 ang nahitabong panag-unay og pinusilay sa tulo ka polis sa Sikatuna Police Station probinsya sa Bohol.
Ilabina nga duha na ka polis ang namatay, una si Police Officer 2 Marlon Balbiran, dead on the spot ug si Senior Police Officer 2 Fidel Malig-on nga nakabsan sa iyang kinabuhi sulod sa tambalanan pasado alas 4 sa hapon, pipila ka oras human sa insidente.
Sumala pa ni Chief Superintendent Manuel Gaerlan direktor sa PRO-7 nga iyang gikasubo ang nahitabong insidente ilabina nga bag-o pa lang nahuman ang Pasko.
Si Gaerlan miingon nga mohimo sila og “internal investigation” sa maong hitabo. Base sa una nilang nadawat nga impormasyon, personal nga bikil ang motibo sa krimen. Gidepensahan hinuon ni Gaerlan ang gihimo ni Police Officer 3 Al-Noel Felicia pagpusil patay kang PO2 Balbiran kay ang naulahi namusil man ni SPO2 Malig-on ug suway usab mipusil kaniya.
Matud pang Gaerlan, self defense ang gihimo ni Felicia ilabina nga armado si Balbiran ug wala kini mipatuo sa dihang gibadlong.
“Base on that information I can say that the act of PO3 Felicia is justified,” matud pa ni Gaerlan.
Nadestino isip Tourist Police si Balbiran samtang si Malig-on nadestino sa Sikatuna Police Station apan silang duha managsilingan sa lungsod sa Loboc.
Bikil sa pamilya ang nakita nga motibo nganong nahitabo kadto apan padayon pang gisubay kun unsay sinugdanan niini.
Si Felicia nga nakadungog sa buto ang dali usab nga miresponde u g iyang napusilan sa ulo si Balbiran hangtod nga nakabsan sa kinabuhi.
Sigun pa ni Gaerlan nga adunay madawat nga pinansyal nga benepisyo ang duha ka mga namatay nga pulis ilabi na si Malig-on nga nagtrabaho niadtong panahona.
Gitambagan usab ni Gaerlan ang iyang mga sakop nga kung aduna may problema dili lang kini ipaagi sa init sa ulo aron dili na mosamot ang problema. – /EIM) (BANAT NEWS)