CEBU, Philippines – Giordinahan na sa pagka-diyakono sa Archdiocese of Cebu ang 13 ka mga seminarista kagahapon sa buntag diha sa Cebu Metropolitan Cathedral nga gipangulohan mismo ni Cebu Archbishop Jose Palma.
Mitambong usab dili lang ang mga kabanay sa mga gi-ordinahan apan lakip na usab ang ilang mga higala ug uban pa nga misuporta sa ilang panaw aron sila hingpit nga ma-ordinahan alang na sa pagka-diyakono.
Ang mga gi-ordinahan mao sila Seminarian Arnel Alubog Autida, Seminarian Teodoro Espino Baruc, Seminarian Dave Christopher Ybanez Cantillas, Seminarian Renato Flores Destacamento, Seminarian Severino Lucero Escobido, Seminarian Kent Dahrel Carzon Galo, Seminarian Erik Toquero Orio, Seminarian Arnel Martel Ponce, Seminarian Giuseppe Obaob Pongase, Seminarian Melchor Zabate Rizon, Seminarian Florido Aloro Rosales, Seminarian Jonathan Diola Rubin, Seminarian Junrey Beboso Siman.
Nahinabi sa Banat News ang usa sa bag-ong gi-ordinahan nga si Reverend Jonathan Rubin, kini miingon dako ang iyang kalipay nga sa hinay-hinay nga paningkamot iyang nakab-ot ang pagka-diyakono.
Ang pagka-diyakono maoy unang ang-ang alang na sa ordinasyon sa pagka-pari ug sa ordinasyon aron mahimong Obispo, mahimo na silang makawali, makabunyag ug uban pa gawas lamang sa pagselebrar og Santos nga Misa.
Matud niya dili sayon ang iyang mga kaagi aron maabot kun hain siya karon sanglit lakip man ang ilang pamilya didto sa Medellin ang nabiktima sa bagyong Yolanda.
Si Rubin mao karon ang Assistant Liaison Officer sa Organizing Committee sa 51st International Eucharistic Congress (IEC) 2016.
Si Palma sa iyang bahin mipasidaan sa mga bag-ong naordinahan nga dili sayon ang bokasyon sa pagka-pari sanglit daghang mga pagsuway ug hagit ang posibleng moabot sa ilang pagpangalagad ngadto sa Ginoo ug sa katawhan ug angay usab silang magpuyo sa simple lang nga kinabuhi. – /EIM) (BANAT NEWS)