CEBU, Philippines – Usa ka 73-anyos nga lalaki mipusil ug miangol sa batan-on niyang umagad tungod sa kasuko nga gidagmalan niini ang iyang pinangga nga apo didto sa Barangay Molao, Compostela kaniadtong gabii sa Pasko.
Gisuwerte hinuon si Josephine Dañoso, 29-anyos, kay ang bala sa 38 kalibre nga revolver nga gipabuto sa iyang ugangan igo lang mitapsing sa iyang liog.
Matud ni PO3 Michael Magallon, desk officer sa Compostela Police Station, nga ang ugangan ni Dañoso nga si Eugenio Laguna milaban sa iyang apo nga gibunalan sa iyang inahan. Gisuwayan unta pagbadlong ni Laguna ang iyang umagad nga dili pasakitan ang iyang anak tungod kay nagsaulog na sila sa Pasko niadtong gabhiona.
Apan matud pa nga gibaliwala lang ni Dañoso ang pagtambag sa iyang ugangan ug mipadayon sa pagkastigo sa iyang anak nga puwerteng nakahilak.
Si Laguna nga wala makaantos nga nagsud-ong sa nagtiyabaw niyang apo, mikuha’g armas ug gipabuthan ang iyang umagad. Ang biktima dali nga gidala sa Danao Provincial Hospital aron maatiman ang iyang pinusilan samtang ang iyang ugangan mitahan sa mga polis uban sa iyang armas. (BANAT NEWS)