CEBU, Philippines – Subay sa kasaulogan sa Pasko ang mga scholars sa Sacred Heart Parish nipahigayon og fund raising activity aron makapuno sa pundo sa galastohan sa dili mominos 20 kapin ka mga tinun-an sa nagkadaiyang kurso nga nagtungha dinhi sa Dakbayan sa Sugbo.
Ang mga scholars nagluto ug maoy namaligya og mga painit para sa manimbahay sama sa puto-bongbong ug bibingka niadtong Misa de Gallo sa nakalabay nga semana.
Matud pa ni Donnabel Cuanan, tinun-an sa Office Administration, nga mapasalamaton sila sa suporta nga gihatag sa parokya nga diin makapadayon sila sa pagkab-ot sa ilang mga damgo.
Sumala pa ni Cuanan, ang usa sa iyang mga hagit sa iyang pagka scholar mao ang kalayo sa iyang pamilya kay mingaw apan wala kini niya gihimong babag tungod kay gihimo usab kini niyang inspirasyon aron magmakugi pa sa iyang mga plano sa kinabuhi.
Gibutyag ni Cuanan, nga kasagaran sa mga scholars parokyano sa Sacred Heart o adunay mga rekomendasyon gikan sa mga trabahante sa parokya. Si Cuanan nipadayag nga gihimo nila ang fund raising activity aron makatabang sa ilang pundo.
Samtang laing scholar nga si Hanna Alisa Dacalos nipadayag nga gawas sa pagkaon nga ilang gibaligya aduna usab silay mga detergent laundry soap nga gibaligya ug ang halin niini maoy ilang ibayad sa ilang medical insurance.
Sa kinatibuk-an dunay 23 ka mga parish scholars ang maong simbahan nga nagtungha sa lain-lain nga eskuylahan dinhi sa siyudad. (BANAT NEWS)