CEBU, Philippines – Gipasakaan na og kaso ang 45-anyos nga babaye sa polis human nasakpan nga naghimo og pabuto sulod sa panimalay niini sa Sitio Lamoy-Kinalumsan, Barangay Gun-ob dakbayan sa Lapu-Lapu.
Kini gibutyag ni Senior Superintendent Armando Radoc, acting chief sa Lapu-Lapu City Police Office nga si Angeles Curacha nga nag-atubang na sa kaso human nakalapas ubos sa Republic Act 7183 or “the law on pyrotechnic devices, persons caught manufacturing, selling, distributing and purchasing." Bisan nakapiyansa, nagkanayon si Mayor Paz Radaza nga ang City Attorney's Office mo-susi sa permit ni Curacha.
"The PNP will file the case and of course, the City Attorney's Office will check in our issuance of the permit kay she should be manufacturing in Barangay Babag," matud ni Radaza.
Subay niini, miawhag si Radoc sa publiko nga magbinantayon sa paggamit og mga pabuto karung Pasko ug sa moabot nga Bag-ong Tuig alang sa paglikay sa disgrasya. Nagpahigayon pag-usab ang kapolisan og laing inspeksyon sa mga pabuto didto sa Barangay Babag kagahapon sa hapon human sa unang pagsusi sa maong dapit sa miaging Biyernes. Ang LCPO mo-deploy og 200 ka police personnel alang sa pag-monitor sa kasaulogan sa Pasko samtang laing 200 ang i-deploy sa Bag-ong Tuig. – /EIM) (BANAT NEWS)