CEBU, Philippines – Unom ka kandidato nga Sugboanon nga parehong magpapili og taas nga posisyon sa sunod tuig nga eleksiyon ang dili na makapadayon sa pagdagan human sila gideklarar sa Commission on Elections (Comelec) nga mga nuisance candidates.
Matud sa Comelec nga kasagaran sa maong kandidato walay financial capacity hinungdan nga gibasura ang ilang certificate of candidacy (COC).
Lakip sa gideklara nga nuisance candidate si Ralph Martirez Masloff nga taga dakbayan sa Lapu-Lapu unta magpapiling presidente sa nasud.
Nasuta sa Comelec Second Division nga si Masloff walay kapasidad nga mogasto og national campaign. Si Masloff mikandidato nga walay suporta gikan sa political party ug gideklara niya sa iyang COC nga usa siya ka designer o engineer.
Gawas niini, gilakip ni Masloff pagsumitir sa iyang COC ang iyang American passport ug birth certificate nga giisyu sa Office of Local Registrar sa Bauan, Batangas. Apan wala siya’y sworn renunciation sa iyang American citizenship.
Ang rekisitos nga mo-qualify sa pagdagan isip presidente ug bise presidente kinahanglan ang kandidato natural-born citizen sa Pilipinas, registered voter, kahibalo mobasa ug mosuwat, nagpanuigon og 40-anyos sa adlaw sa eleksiyon, nagpuyo sa Pilipinas sulod sa 10 ka tuig.
Nasuta usab sa Comelec nga si Masloff migamit og laing pangalan sa iyang COC diin dili kini pareha sa pangalan nga iyang gigamit sa iyang American passport.
Ang summon sa Comelec wala kini ma-serve ngadto kang Masloff tungod kay dili ma-locate ang address nga iyang gihatag.
Subay sa Akta Republika No. 7166 kon “An Act Providing for Synchronized National and Local Elections and for Electoral Reforms, Authorizing Appropriation Therefore, and for Other Purposes,” ang gitugot nga magasto sa usa ka kandidato sa iyang pagpangampaniya P10 ang presidente ug bise presidente ug P3 sa ubang kandidato matag usa ka botante. Ang kandidato nga walay political party o walay suporta gikan sa political party gitugotan kining makagasto og P5 sa matag usa ka botante.
Gawas kang Masloff, si Quiterio Castilla ang mikandidato usab sa pagka-presidente sa nasud. Samtang sila si Joey Marcaida, Alejandrino Villarico Suarez, Victor Quijano ug Pol Licia Bulilian mikandidato pagka-senador, pulos sila nagbutang og address nga Cebu City.
Ang lima gideklara usab sa Comelec nga mga nuisance candidates sa samang rason o walay financial capacity.
Ang Comelec nagkanayon “While indeed material possession is not a constitutional or statutory requirement in aspiring for a public office, it is always true that election campaign, particularly for the highest government position in the land entails significant expenditures which cannot adequately covered by earnings of ordinary men.” - /EIM) (BANAT NEWS)