CEBU, Philippines - Dili taga Barangay Pajo, Dakbayan sa Lapu-Lapu ang nalambigit sa kaso sa sex trafficking.
Kini ang giklaro ni Barangay Kapitan Junard “Ahong” Chan, pangulo sa Barangay Council for the Protection of Children, human usa ka mahuyang nga ginganlan og Jojo Sanchez ang gidakop sa mga operatiba sa anti-sex trafficking gumikan sa pagpamugaw og duha ka 17-anyos ug usa ka 14-anyos sa usa ka bar.
Matud ni Chan nga sagad sa mga babaye nga mobaligya sa ila’ng lawas nagagikan pa sa nagkalain-laing siyudad ug modagsa sa ila’ng lugar ilabi na sa dalan sa Maximo Patalinghug Avenue diin nahimutang ang daghang bars.
Gipahibawo ni Chan nga matag gabii sila mo-ronda kuyog sa mga tanod sa lugar.
Aron maestorya ang mga babaye, gibuhat ni Chan ang pagpakaaron-ingnon nga kustomer diin nasayran niya nga ang mga babaye gikan sa Dakbayan sa Sugbo ug Mandaue.
“Ato’ng giingnan nga tabangan sila sa barangay kay naa man ta’y high-speed sewing nga trabaho dinhi but dili sila ganahan kay sa ila’ng trabaho ron, mas daku kay one-hour kay P300,” paambit ni Chan.
Gimanduan ni Chan ang iya’ng grupo nga mosuhid sa mga dapit nga tambayan sa mga menor de edad ug kung may masakpan, ila kini’ng i-turnover sa Department of Social Welfare and Development sa siyudad. (BANAT NEWS)