CEBU, Philippines - Usa ka eroplano sa AirAsia ang naaberiya human sa pagtugpa niini diha sa Mactan-Cebu International Airport sa Dakbayan sa Lapu-Lapu hinungdan nga giguyod nalang kini padung sa rampa.
Kini gikumpirma ni Bert Segovia sa Civil Aviations Authority of the Philippines (CAAP) sa MCIA human nga nag-emergency landing ang AirAsia Flight Z2 763 kagahapon sa buntag gikan sa Manila.
“Minor ra man, nangutana ko sa (air traffic) controller sa tower, Zest Air ang eroplano. Gisugat sa tow truck ug gidala padulong sa may ramp,” matud ni Segovia.
Sa giluwatan nga press statement sa Philippines AirAsia pinaagi sa text message, ang eroplano adunay 166 ka pasahero luwas nga nakatugpa sa MCIA pasado alas-8 sa buntag.
Miangkon ang AirAsia management nga adunay nasinating kakulian ang eroplano ug ilaha kini karong giimbestigahan.
“The plane had technical issue on its way to the ramp and had to be towed. Safety and engineering team are currently checking the cause,” matud sa AirAsia press statement.
Sa laing bahin, si Andrew Harrison, Chief Executive Advisor sa GMR-Megawide Cebu Airport Corporation nagkanayon nga ang aksyon nga gihimo sa crew sa AirAsia usa lamang ka “precautionary measure” ug tanang piloto sa nagkalain-laing airlines nakahibalo unsay angay buhaton sama niini. “It was a precautionary measure when emergency is declared and the pilots of all these different air lines are trained to handle emergencies very well and they did their job as professionally as ever,” matud ni Harrison ngadto sa mga tigbalita.
Midugang si Harrison nga adunay kapabilidad ang MCIA aron motubag sa mga emerhensiya.
“Any emergency that will happen in the airport is well prepared. We have a structured emergency plan, including the fire brigade and all emergency service to respond to every type of emergency related to an airport,” pasablig pa ni Harrison.
Sumala pa sa report nga padayon pang gisusi karon sa mga imbestigador, hydraulic system ang nagkaproblema sa maong abyon. (BANAT NEWS)