CEBU, Philippines - Duha ka tawo ang patay human nabangga sa poste ang ilang gisakyang motorsiklo diha sa national highway sa Brgy. Poblacion, Lungsod sa Pinamungajan.
Giila ang mga biktima nga sila si Diana Atuel, 26, taga Sitio Bonbon, Poblacion sa maong lungsod ug si Carla Bubuli, 25, taga Sitio Looc, Bato sa Dakbayan sa Toledo.
Sa imbestigasyon sa Pinamungajan Police Station, nasayran nga ang mga biktima luwan sa motorsiklo gikan sa usa ka kalingawan sa Cabiangon, Pinamungajan.
Paingon na unta nga mopauli ang duha apan pag-abot sa kurbada nga bahin sa nahitaboan, nawad-an og kontrol ang drayber nga si Bubuli hinungdan nga nadasmag kini sa poste.
Nakahiagom og grabeng samad ug bun-og sa kalawasan ug ulo ang mga biktima ug daling gidala sa Pinamungajan District Hospital apan gideklarar nga dead on arrival si Atuel.
Samtang si Bubuli daling gibalhin sa tambalanan sa Dakbayan sa Sugbo apan niadtong nakalabay’ng adlaw nakabsan gihapon kini sa kinabuhi sumala pa sa kapolisan. (BANAT NEWS)