CEBU, Philippines - Nagbuy-od na sa daplin sa karsada ang usa ka person with disability (PWD) nga gidudahang gipuspusan og kahoy sa ulo diha sa Sitio Liptong, Barangay Nug-as Lungsod sa Alcoy sa nakalabay nga buntag.
Ang biktima giila nga si Rene Vivar, 35, nagpuyo sa Barangay Cabutongan sa Lungsod sa Boljoon.
Matud pa ni Police Officer 2 Erland Salonoy, desk officer sa Alcoy Police nga nahinabi sa Banat News, aduna silay nakuha nga upat ka tiil nga bulos sa kawayan diha sa crime scene nga gituohan nilang maoy gigamit sa pagbunal sa biktima.
Sa imbestigasyon sa Alcoy Police nasayran nga katapusang nakita nga buhi ang biktima alas- 8 sa nakalabay nga gabii diha sa balay sa iyang higala nga si Elmer Pelago diin didto kini nanihapon.
Nagduda ang kapulisan nga lagmit giatangan sa dalan ang biktima sa wala pa mailhing kriminal ug didto kini gipatay. Grabeng bun-og sa ulo ang naangkon ni Vivar nga gidudahang gipusposan sa kawayan nga nakit-an duol sa iyang lawas.
Si Salonoy miingon nga guoron nga kawayan ang ilang nakuha diha sa crime scene.
“Gahi kaayo to nga kawayan kay kadtong dapit sa punoan, solid kaayo mao’y gigamit pagbunal,” matud pa ni Salonoy. Nagduda ang kapolisan nga natripingan sa mga bugoy ang biktima bisan kini baldado molakaw. (Jojo C. Ugdol/EIM)(BANAT NEWS)