CEBU, Philippines – Mokabat sa 200 ka mga drayber sa managlaing rota sa Cebu ang mosalmot sa transport strike karong adlawa agi og pagsupak sa pag-phase out sa mga pasaheroan nga sakyanan nga miabot na og 15 ka tuig. Mao kini ang gibutyag ni Greg Perez, kinsa presidente sa Pinagkaisang Samahan ng mga Tsuper at Operator Nationwide(PISTON)-Cebu. Sigon pa ni Perez nga maglakaw ang mga drayber gikan sa M.J. Cuenco Avenue padulong sa opisina sa Land Transportation Franchising and Regulatory Board sa J. Briones Street sa North Reclamation Area.
“Dili namo tuyo ang pagparalisa sa trapiko, gusto lang namong ipadayag among pagsupak sa gipatuman nga pagpa-phase out aning pampublikong sakyanan nga nagdagan na og kinse ka tuig. Dili gyud mi uyon ana,” sigon pa ni Perez.
Matud niya nga ang mga drayber ug operators gikan sa Alliance of Transport Organization Members Intra-Cebu ug National Confederation of Transportworkers' Union nipahibalo nga moduyog sila sa kalihokan.
“Dili man mi supak nga manindot ang mass transport sa atong probinsya pero ang amoa lang, hangtod dili makapangita ang gobiyerno og laing panginabuhian sa mga (mawad-ag trabaho nga) drayber ug operators,” dugang niya.
Ang Cebu City Transportation Office pinangulohan ni Atty. Rey Gealon mipahibalo nga andam na sila sa strike sa mga drayber.
Sumala pa ni Gealon, ilang girespeto ang katungod sa mga driver apan dili sila motugot nga adunay daghan mga pasahero nga matanggong kay way masakyan.
Adunay daghang traffic enforcers nga ipakatap aron motabang sa kahapsay ug kalinaw sa kadalanan ug aron usab dili maharas ang mga driver nga mobiyahe anang panahona.
Gipahibalo usab ni Gealon nga dunay mga sakyanan ang Cebu City nga mohakot sa mga matanggong nga pasahero.
Dako hinuon ang pagtuo ni Gealon nga dili makaparalisar sa transportasyon ang maong strike tungod kay daghang mga drayber usab ang uyon sa mas maayo, limpyo ug komportableng sakyanan nga pasaheroan. – /EIM) (BANAT NEWS)