CEBU, Philippines - Usa sa duha ka transmission lines sa National Grid Corporation of the Philippines nga nag-suplay og kuryente sa Dakbayan sa Lapu-Lapu nadaot human nadasmagan sa heavy equipment nga nag- road concreting sa dalan Plaridel ug Don Gerardo Ouano Streets kagahapon.
Gipahibalo ni Ma. Rosette Martinez, corporation and communication officer sa NGCP naigo sa backhoe ang poste ug nabugto ang 50 ka metros nga kable niini niadtong Oktubre 20.
Matud ni Gerardo Torres, pangu sa Visayas Operation and Maintenance alang sa restoration sa damage cable ayuhon kini sulod sa 45 ka adlaw ug kadtong uban human na sa 51st International Eucharistic Congress (IEC). Ang maong 138,000 volts transmission line nag-supply og kuryente sa Dakbayan sa Mandaue ug Lapu-Lapu hinungdan nga usa na lang ka linya ang nagsuplay og kuryente sa duha ka siyudad. “Kining nahibilin nga transmission line namo kun makasinati usab og kadaut mag-brownout na sad ta ana,” pasabot pa ni Martinez.
Sa pagkakaron wa pay problema silang nasugatan kay paigo pa ang supply nga mahatag sa nahibiling power installation apan nabalaka sila kun magkaproblema kini. (BANAT NEWS)