CEBU, Philippines - Gikatakda na nga ipatuman ang road concreting sa Department of Public Works and Highways (DPWH) 7 sa dalan Plaridel ug dalan Soriano Avenue sa Dakbayan sa Mandaue ug gipaabot nga masinati na usab ang mas grabe pang paghuot sa mga sakyanan sa maong lugar.
Ang Department of Public Works and Highways (DPWH) 7 maoy motrabaho niini ug tungod sa maong proyekto dili una ilusad ang bicycle lane sa dalan Sotero B. Cabahug nga gitakda unta karong Disyembre 16 niining tuiga.
Si Roger Paller, Public Information Officer (PIO) sa kagamhanan sa maong dakbayan miingon nga ang dalan SB Cabahug nga mao untay butangan sa bicycle lane gamiton isip alternatibong agianan sa mga sakyanan kun masirado ang dalan Plaridel ug A. Soriano Avenue tungod sa road concreting nga pagahimoon.
Matud pa ni Raymond Cataluña, project engineer sa DPWH 7 ilisan na ang sementadong karsada sa lugar nga gipundohan og P129 milyones ug tapuson dayon sud sa tulo ka bulan.
Si Florentino Nimor, planning officer sa dakbayan sa Mandaue mibutyag nga kun magdungan ang road concreting sa dalan Plaridel ug A. Soriano Avenue ug ang pagsirado sa Mandaue-Mactan Bridge momugna gyud og problema sa trapiko sa lugar. Sa nasayran nga hugot nga gisupak ni Mayor Paz Radaza sa Dakbayan sa Lapu-Lapu ang pagpahigayon sa repairs sa maong taytayan tungod sa duha ka dagkong kalihokan sa Sugbo sa sunod tuig nga naglakip sa Sinulog sa Dakbayan sa Sugbo ug International Eucharistic Congress. (BANAT NEWS)