CEBU, Philippines - Nikabat sa P20 milyones ang nagasto sa Kapitolyo sa pagpa-rehabilitate sa Juan Dosado Memorial Hospital sa Lungsod sa Sogod.
Si Gobernador Hilario Davide III nakigtambayayong sa Department of Health sa pag-ayo sa hospital structures ug pag-upgrade sa pasilidad. Tumong niini nga ang mga residente sa lugar makapahimulos sa serbisyo sa panglawas.
Ang budget gikan sa DOH ubos sa ila’ng Health Facilities Enhancement Program (HFEP).
Ang probinsiya maoy nag-implementar sa proyekto ug mao usab ang nag-supervise sa construction works aron maseguro nga matuman ang target nga schedule nga mahuman.
Sunod tuig gilauman nga adunay dugang suplay sa tambal sa mao’ng tambalanan human ang probinsiya niaprobar sa P2.5 milyones nga budget sa mao’ng tambalanan.
Ang mao’ng tambalan aduna’y Comprehensive Emergency Obstetrics and Newborn Care (CEmONC) aron mahatagan og maayo’ng pag-atiman ang mga nagsabak nga pasyente ug ang building niini hapit na mahuman. Ang hospital aduna usab kini’y sewage treatment plant aron masulbad ang problema sa water disposal ug P2.4 milyones ang gigahin niini.
Ang mao’ng proyekto 98 porsiyento na ang nahuman. (BANAT NEWS)