CEBU, Philippines - Gipaabot nga sa dili pa ang kapistahan sa Balaang Bata, Senior Sto. Niño ug 51st International Eucharistic Congress sa Enero, mahuman na ang restoration sa kampanaryo sa Basilica Minore del Sto. Niño nga naguba sa linog.
Gibutyag ni Rev. Fr. Jonas Mejares nga nakadawat siya og suwat gikan sa National Historical Commission of the Philippines nga dunay ipahigayon nga turn-over ceremony sa Enero 23.
Ang NHCP masaligon nga ang restoration sa belfry tower mahuman sa dili pa ang Sinulog ug IEC.
Giangkon ni Fr. Mejares nga duha ka tuig gyud siya nagproblema kun unsaon pag-restore sa nagusbat nga kampanaryo.
Gihulagway sa pari nga duna gyu’y solusyon ang problema sanglit ang kontraktor nga gikuha sa NHCP mao ang 401 Construction nga nasuhito sa pag-ayo sa belfry ug paspas usab ang pagtrabaho nga gisugdan niadto’ng buwan sa Hulyo.
Adunay kausaban nga gipatuman sa pag-restore sa belfry tower sama sa gibag-on ug ang kampana nga gikan sa pito nahimo nalang unom kay ang labi’ng daku dili naman ibalik kay delikado.
Plano sa simbahan nga ang daku nga kampana ibutang sa simbahan ug posible’ng himuong historical site nga mahimo’ng bisitahon sa publiko.
Dili mominus sa P20 milyones ang gasto sa pagpaayo sa belfry tower ug sagad sa pundo nga gigamit gikan sa NHCP ug ang uban gikan sa donasyon sa mga tawo.
Labot sa plano nga dili na paagian og sakyanan kilid sa simbahan nga duol sa belfry, sigun ni Fr. Mejares nga ila na kini’ng napresentar ngadto sa konseho sa siyudad ug masaligon sila nga uyunan ang ila’ng tinguha.
Samtang gawas sa belfry tower, lakip ang Magellan’s Cross ang giayo kay naapektuhan usab kini sa linog ug nalangan lang kini gumikan sa APEC Meeting sa Sugbo kay ang mga delegado gusto man makakita niini.
Sama sa belfry tower, target usab nila nga mahuman ang Magellan’s Cross sa dili pa ang Sinulog ug IEC.
Ang mao’ng proyekto gipunduhan gihapon sa NHCP. (BANAT NEWS)