CEBU, Philippines – Nilampos gyud sa pag-eskapo ang pusher atol sa buy-bust operation alas 2 sa kadlawon sa niagi’ng adlaw sa Barangay San Vicente, Dakbayan sa Bogo apan ang kauban nga mao’y gipaon ang nadakpan ug nabalhug sa bilanggoan.
Si Police Officer 1 AIan Basete sa Bogo City Police Station niila sa nadakpan nga si Jaime Bolambao, 30-anyos, taga Sitio Pinabilin, Nailon, kinsa nasakmitan og lima ka pakete’ng shabu ug P1,000 nga marked money.
Ang target nga si Alvin Ruiz ang nakaeskapo kinsa gikasabot sa poseur buyer apan ang gitug-an nga kolor sa T-shirt ang sa iya sa kauban.
Diha’ng gikahinagbo na ang duha ka tawo nga nagtagsa pagsakay og motor, mao’y giduol sa poseur buyer ang gitug-an nga kolor sa T-shirt ug gipalitan og shabu.
Sa pagtunol sa suspek, dali kini’ng gidakop sa kapolisan ug ang nagpaatbang lang nga si Ruiz nga nakakita nga gidakop ang iya’ng kauban ang dali’ng nakapabulhot og padagan ug naka-eskapo. (BANAT NEWS)