CEBU, Philippines – Naugdaw ang upat ka balay ug duha ang wala mahurot human niulbo ang sunog kagahapon sa udto sa Sitio Whiteland, Tuyan, Dakbayan sa Naga.
Sumala pa ni Fire Officer 1 Ronel Andagan sa Naga City Fire Station nga nadawat nila ang alarma alas 12:50 kagahapon sa udto apan gideklarar nga under control human sa lima ka minutos.
Gilamoy sa kayo ang panimalay ni Ruel Manomag, Tefilio Repulio, Jun Polido, Nicanora Bariquit, Luz Tomaquin ug Dalia Bayabos.
Sumala pa ni Andagan nga base sa imbestigasyon ni FO2 Rey Heridiano nga nagsugod ang kayo sa balay ni Manomag tungod sa linya sa kuryente.
Nikuyanap dayon sa mga silingan tungod kay sikit ang kabalayan ug ginama sa light materials.
Alas dos na sa hapon napawong ang kayo nga nilamoy sa upat ka balay ug nagbilin og duha nga partially damaged. (BANAT NEWS)