CEBU, Philippines - Mamaligyaay og ginadili’ng drugas ug armado’ng tawo ang nasikop sa kapolisan sa Siyudad sa Talisay niadtong Miyerkules sa hapon sa Magay, Barangay Tanke.
Nagtingkagol sa prisohan mao sila si Jowely Fernandez, 30-anyos, ulitawo ug si Genesa Cabangca, 33, minyo, pulos nagpuyo sa nahisgutang lugar. Sa imbestigasyon sa kapolisan nasayran nga ang duha nakit-an sa nagpakabana’ng molupyo nga namaligya og drugas hinungdan nga daling nitawag sa kapolisan.
Niresponde ang mga awtoridad ug didto ilang nasita ang duha. Nakuhaan og pugakhang si Fernandez nga adunay duha ka bala samtang usa ka medium pack ug 10 ka gagmay nga pakete sa shabu ang nakuha gikan ni Cabangca.
Wala hinuon nipakita og pagsukol ang duha ug niuban sa kapolisan sa ilang buhatan ug gikatakdang pasakaan sa tukma’ng kaso. (BANAT NEWS)