CEBU, Philippines - Nadismaya si Gobernador Hilario Davide III sa hukom sa Ombudsman sa pagpalingkawas ni kanhi gobernador ug karon Kongresista Gwendolyn Garcia sa kontrobersiya sa pagpatukod sa Cebu International Convention Center.
Matud ni Davide nga dili siya uyon sa Aguinaldo Doctrine diin mahimo’ng gawasnon sa kaso’ng administratiba ang usa ka pinili’ng opisyal nga may kaso sa una’ng termino kung masublian kini sa pagpapili.
Suma pa ni Davide nga dili tanang tawo nga nipili alang sa laing termino nakahibawo sa kasaypanan nga nahimo sa opisyal.
Matud ni Davide nga kung wala pa ang Aguinaldo Doctrine manubag gyud unta si Garcia sa nahimo niini’ng kalapasan sa procurement law.
Ang CICC natukod niadto’ng tuig 2006 alang sa pagpahigayon sa Association of Southeast Asian Nations (ASEAN) Summit sa Sugbo.
Si Garcia nihangop sa desisyon sa Ombudsman diin wala’y nakita nga sukaranan ang pasangil nga pagpaburot sa presyo sa CICC.
"The Ombudsman itself has found no overpricing in the construction of the CICC. This should clear the issue once and for all, and should guide those who wish to capitalize on it to "never again" replace the truth with their own facts," matud ni Garcia. (BANAT NEWS)