CEBU, Philippines - Gipaabot nga magdasok na usab ang mga bisita sa Sugbo karong buwan sa Enero sunod tuig tungod sa Sinulog ug nadugang pa gyud ang umaabot nga International Eucharistic Congress.
Ang IEC committee nihangyo karon sa mga nanag-iya og hotels ug pension houses operators nga kung mahimo dili patas-an ang ilang rates.
Kagahapon sa hapon nagtagbo ang mga kadagkuan sa maong mga patigayon ug ang committee sa IEC nga gipangulohan ni Auxiliary Bishop Dennis Villarojo, ang secretary general sa 51st IEC.
Gihangyo sila ni Villarojo nga dili pasakaan ang presyo sa ilang serbisyo tungod kay ang mga nanambong dili man susama sa mga delegado sa Asia Pacific Economic Cooperation nga ilang nasud nga gigikanan maoy mogasto sa ilang biyahe.
Sumala pa ni Villarojo, ang mga delegado sa IEC personal gayud nila kining mga gasto ang pag-apil.
Gibutyag ni Villarojo, karon pa lang duna nay mga hotels ang puno na, pero aduna pa gihapoy daghan mga bakante.
Ang obispo nipadayag nga cooperative ra man usab hinoon ang mga operators.
Ang mga kalihokan sa IEC nadungan-dungan sa umaabot usab nga selebrasyon sa Sinulog dinhi sa dakbayan nga kaniadto pa pirme nang fully-booked panahon sa maong pista. (BANAT NEWS)