CEBU, Philippines - Respetuhon ug likayan ang pamolitika, kini maoy panawagan sa executive director sa Sinulog Foundation Ricky Ballesteros ngadto sa mga politiko atol unya sa ipahigayon nga Sinulog Grand Parade nga ipahigayon dinhi sa Dakbayan sa Sugbo sunod buwan.
Matud pa ni Ballesteros, aduna silay mga tamdanan nga ipakatap ngadto sa tanang mga contingents nga buot mosalmot sa parade ug usa niini nga dili mamolitika ang ilang mga sponsors sama sa paglamano diha sa mga kadalanan ug pagpanaud og mga political tarpaulins bisan asa sa ilang floats.
Sumala pa ni Ballesteros, kung mahimo unta nga ihikling una nila ang ilang pagkakandidato kun gusto gyud silang mosaksi sa kalihokan.
Gibutyag usab ni Ballesteros, nga angay ipatigbabaw ang respeto ug dili pamolitika panahon sa kapistahan sa Balaan nga Bata tungod kay pangilin kini alang lamang ni Senyor Sto. Niño.
Si Ballesteros nipadayag nga sa higayon nga magsugod na ang kalihukan sa Sinulog wala na silay gitugotang politiko nga mamulong atubangan sa mga tawo.
Gipahibalo usab ni Ballesteros nga makig-alayon sila sa buhatan sa Commission on Elections aron masayran nila ang mga guidelines para sa mga politiko tungod kay hugot nilang gilikayan nga makoloran og pamolitika ang maong kalihukan. (BANAT NEWS)