CEBU, Philippines - Namatay sulod sa tambalanan ang usa ka inahan nga giingong bag-ohay lang nanganak sulod sa kasilyas apan dunay pagdudang iyang gilumsan ang iyang anak diha sa balde sud sa kasilyas sa ilang balay sa Ridgedale Subdivision, Barangay Talamban ning dakbayan sa Sugbo niadtong nakalabay nga adlaw.
Ang inahan giila nga si Maribeth Tacda, 35, nagpuyo sa maong dapit nga gipabantay sa usa ka yuta apan lumad nga taga Negros.
Matud pa ni Police Officer 3 Jerry Genelaso, imbestigador sa Homicide Section sa Cebu City Police Office nga nahinabi sa Banat News nga pasado alas 11 sa nakalabay nga buntag ang igsuon niini nga si Imelda Hechenova, 47, nakabantay sa igsuon nga nangluspad na ug nagluya.
Misamot pa ang kabalaka ni Imelda sa dihang iyang nakita nga nagkadugo ang bilahan niini hinungdan nga dali nila nga gitabang ug gidala sa Vicente Sotto Memorial Medical Center (VSMMC).
Didto nila nahibaw-an nga gikan diay nanganak si Maribeth subay sa nakita sa nag-atiman nga doktor butang nga gikatingala sa maguwang kay wa man sila mahibawo nga mabdos diay kini.
Bisan giunsa sa pagpangutana si Maribeth sa doktor ug ni Imelda wala gayod kini miangkon nga gikan kini nanganak.
“Natingala intawon iyang magulang sa giingon sa doktor nga gikan daw nanganak, mao to’ng iyang gipangutana kay makaestorya pa man siya adto, wa gyud miangkon. Bisan ang doktor mipangutana wala siya miangkon,” matud pa ni Genelaso.
Tungod niini gisubay sa maguwang ang gipuy-an sa manghod ug iyang nadiskobrehan sa kasilyas ang usa ka puya nga lalaki sulod sa usa ka balde nga adunay tubig nga gibana-bana nga siyam ka bulan.
Kapin duha ka oras human gitabang sa tambalanan si Maribeth, nakabsan kini sa iyang kinabuhi.
Gisusi karon sa kapolisan ang posibilidad nga gituyo ang pagpatay sa masuso aron matago nga mabdos kini. Nasayran usab sa kapulisan nga hasta ang bana ni Maribeth nga usa ka taxi driver wala usab nasayod nga mabdos ang iyang asawa. Ang magtiayon adunay upat ka mga anak. (BANAT NEWS)