CEBU, Philippines - Patay ang magtiayon nga gitulis ug gipamusil sa karnaper samtang swerteng naluwas ang 5-anyos nilang anak human nahitabo ang krimen alas-10 pasado ang takna sa miaging Domingo sa gabii diha sa Sitio Matab-ang, Barangay Day-as, Lungsod sa Cordova.
Si Senior Police Officer 1 Laurencio Wagwag sa Cordova Police Station miila sa biktima nga mao sila si Ranilo Tampus ,33, purchaser sa Mactan Cebu International Airport ug asawa nga si Elsa Tampus, 38, pulos nagpuyo sa Barangay Apas, Dakbayan sa Sugbo apan nag-abang og panimalay sa Barangay Buagsong sa nahisgotang lungsod.
Matud pa ni SPO1 Wagwag nga angkas sa motorsiklo ang magtiayon kauban sa ilang 5-anyos nga anak nga babaye gikan sa giabangan nilang panimalay sa Barangay Buagsong.
Apan nakadagan pa lang og 200 metros gikan sa ilang giabangang balay ang mga biktima dihang gibabagan sila og duha ka wala mailhing armadong mga lalaki ug gipahunong ilang motorsiklo. Gipakanaug sa duha ang ilang anak ug diha-diha gipamusil sa mga kriminal ang magtiayon atubangan sa bata, ang ginang gipusil sa ulo samtang sa tiyan gipusil ang bana.
Human niini, gikuha sa tulisan ang backpack sa ginang nga gituohang adunay sud nga salapi ug pagkahuman gisakyan ang motorsiklo sa mga biktima ug misibat palayo.
Daling gitapokan sa daghang mga tawo ang mga biktima samtang ang bata diha lamang sa daplin sa dalan nga nagpunay og hilak.
“Wala man gyuy nakakita sa maong hitabo. Pulos lang ambot ang mga tawo og imong pangutan-on,” matud pang Wagwag.
Gidala ang magtiayon sa Lapu-Lapu City District Hospital apan gideklarar kini sa mga doktor nga dead on arrival.
Nakaplagan sa crime scene ang usa ka kabhang sa kalibre 45 ug duha ka deformed slugs.
Ang anak sa magtiayon temporaryo karon nga gikostudiya sa Department of Social Welfare (DSWD) tungod kay daw na-trauma kini sa nahitabo sa iyang mga ginikanan.
Mao na kini ang ikaduhang insidente nga susama og modus operandi ang mga tulisan diin pusilon una ang mga biktima ug kuhaon ilang mga butang lakip ang motorsiklo.
Niadtong naghinapos nga buwan sa Oktubre ning tuiga kalit nga gipamusil ang duha ka manag-uyab diha sa Sitio Camolinas, Barangay Poblacion sa mao gihapong lungsod ug gikuha ilang mga cellphone, salapi ug ang ilang motorsiklo.
Ang maong kaso hangtud karon wa pa gihapon masulbad. (BANAT NEWS)