CEBU, Philippines - Daw sa nag-shopping ang mga kawatan nga nilungkab sa balay sa usa ka British sa Barangay Buhingtubig, Pinamungajan pasado alas 2 sa nakalabay nga hapon human gipanghakot ang mga senina, sapatos, mahalong gadget ug uban pa’ng mahalon nga gamit sulod sa balay.
Ang biktima mao si Peter Michael Allen, 59, minyo nga nagpuyo sa mao’ng dapit.
Matud ni Senior Police Officer 1 Rey Toquero, desk officer sa Pinamungajan Police Station, nga nahinabi sa Banat News nga pasado alas 12 sa nakalabay nga udto nibiya sa iya’ng balay kauban ang iya’ng mga higala nga langyaw paingon sa usa ka beach resort sa lungsod.
Lagmit nakahibawo ang mga kawatan nga wala’y tawo ang balay hinungdan nga ila kini’ng gisulod pinaagi sa pagsaka sa kahoy tupad sa konkreto’ng koral sa balay hangtud nakasulod.
Gibuak sa kawatan ang bildo nga pultahan sa balay ug gipanghakot ang mga mahalong gamit nga kantidad og P119, 000.
Nagduda si Toquero nga lagmit dili lang usa ka tawo ang nihimo sa krimen gumikan sa kadaghan nga mga gamit nga nakawat.
Lagmit usab sa likod sa balay nisibat ang kawatan agi sa kakahuyan nga wala’y nagpuyo.
Pasado alas 3 sa hapon diha’ng nakauli sa iya’ng gipuy-an ang biktima ug didto iya’ng nahibaw-an nga gilungkab na ang iya’ng balay.
Nagtuo si Toquero nga posible’ng taga ila ra usab ang nihimo sa pagpanglungkab gumikan kay dali ra man kini nga nakahibawo nga wala’y tawo ang balay. (BANAT NEWS)