CEBU, Philippines – Patay ang usa ka lola human nadasmagan og motorsiklo sa national highway, Segra, Buanoy, Balamban pasado alas 6 sa nakalabay nga buntag.
Ang biktima giila nga si Teodorica Vego, 63, minyo ug nagpuyo sa mao’ng dapit, samtang ang drayber sa Kawasaki Rouser mao si Raymond Rosenio, 26, taga Dakbayan sa Toledo.
Sa imbestigasyon sa Balamban Police nasayran nga samtang nagdagan ang motorsiklo paingon sa norte nga bahin ug pag-abot sa mao’ng dapit wala nabantayi ang biktima nga nitabok sa karsada hinungdan nga maayo’ng pagkasampak sa motorsiklo.
Ang biktima maayo’ng pagkalabay ug nakaangkon og grabe’ng bun-og sa iya’ng ulo. Suway pa unta nga gidala sa Balamban District Hospital apan gideklarar na kini nga dead on arrival.
Sa inisyal nga pagsubay sa kapolisan sa drayber sa motorsiklo, wala kini nakapakita og driver’s license. Samtang sa lungsod sa Pinamungajan, kritikal ang kahimtang sa usa ka lolo human nadasmagan sa usa ka motorsiklo sa Barangay Tajao pasado alas 5 sa nakalabay nga hapon.
Giila ang biktima nga si Rogelio Fajardo, 63, minyo nga nagpuyo sa mao’ng dapit, samtang ang drayber mao si Ryan Keith Montenegro, 35, taga Barangay Poblacion.
Sumala pa ni Senior Police Officer 1 Rey Toquero, desk officer sa Pinamungajan Police Station, nga nahinabi sa Banat News nga nitabok ang biktima sa karsada.
Matud ni Toquero nga posible’ng kusog ang dagan ni Montenegro kay maayo man pagkalukot sa biktima lakip sab ang motorsiklo.
Grabe’ng bun-og sa lawas ang naangkon ni Fajardo kinsa dali nga gidala sa Vicente Sotto Memorial Medical Center samtang ang drayber gidala usab sa South General Hospital human nakaangkon og mga pangos sa kalawasan.
Si Toquero dunay nakuha nga impormasyon nga nakabsan sa kinabuhi ang biktima sulod sa VSMMC apan ila pa kini nga subayon aron makompirmar. – /GMR) (BANAT NEWS)