CEBU, Philippines – Gikatakda’ng mag-house-to-house ang kabomberohan sa Siyudad sa Talisay aron sa pagpahibawo sa katawhan nga dili magpataka og gamit og dekorasyon sa mga panimaye labi na series lights karong Pasko.
Si Chief Insp. Randy Mendaros, hepe sa kabomberohan sa dakbayan, nagkanayon nga molibot sila sa kabarangayan.
"Kung dili ta kamao og unsaon paggamit ug unsa sab nga klase sa Christmas lights ang ato’ng gigamit delikado gyud ta labi na ang ato’ng mga balay. Mao na nga mag-amping ta," matud ni Mendaros.
Iya’ng gipahimangnoan ang tanan sa dili pagpalit og fake o substandard nga Christmas lights aron malikay sa sunog o electrical trouble.
Si Mendaros nagkanayon nga tan-awon gyud sa katawhan ang ilang series lights nga gusto’ng paliton kun aduna ba’y ICC o Import Commodity Clearance ug Philippine Standards (PS) seal.
Matud niya nga kinahanglan nga aduna gyu’y oras taman ang paggamit sa series lights aron momenus ang porsiyento nga kini makamugna og sunog ug aron nga makadaginot pa sa kuryente. Iya sad gipahimangnoan ang tanan nga likayan ang overloading sa paggamit sa elektrisidad ug paggamit sa octopus connection ug pagpalit og sub-standard nga series lights. – /GMR) (BANAT NEWS)