CEBU, Philippines – Duha ka menor de edad ug laing manuyopay ang nasikop sa kapulisan sa Siyudad sa Talisay niadtong Sabado sa gabii diha sa Sitio Magay, Barangay Tanke sa maong dakbayan.
Ang mga menor de edad nga nanuyop nag-edad og 16 anyos ug 17 anyos nga taga Barangay Inayawan , Cebu City ug Barangay Candulawan sa Lungsod sa Minglanilla. Samtang nadakpan usab sila si Bernard Labalan ug Eric Homada,32.
Sila si Inspector Windel Abellana nitubag sa tawag sa concerned citizen nga nagpahibalo nga adunay nanuyop og drugas diha sa usa ka balay sa nahisgutang dapit nga miresulta sa pagkasikop sa upat.
Nakuhaan og drug paraphernalia ang upat lakip na ang tin foil, lighter ug mga plastics nga gisudlan sa ginadiling drugas.
Samtang duha ka gipasanginlang drug pushers ang nadakpan diha sa Sitio Fatima sa Barangay Jubay, Lungsod sa Liloan ug sa Pitogo, Consolacion sa managlahing operasyon.
Si Police Officer 3 Jayson Gayo sa Liloan Police Station miila sa ilang dinakpan nga mao si Darrel Bataluna, 37, human nila napalitan og drugas. Samtang ang laing nadakpan mao si Michael Baldado, 20, nga gawas nga nakuhaan og shabu nasakmitan usab kini og kalibre .38 nga armas uban sa mga bala niini. – /EIM) (BANAT NEWS)