CEBU, Philippines – Mokabat sa kapin usa ka milyon ka pesos nga kantidad sa shabu ang nasakmit sa kapulisan sa Provincial Intelligence Branch (PIB) sa Cebu Provincial Police Office atol sa duha ka managlahing operasyon kontra ilegal nga drugas sa dakbayan sa Talisay sa nakalabay nga hapon.
Baynte-kwatro (24) ka tawo ang nadakpan apan nakasibat ang target sa kapulisan. Matud pa ni Senior Inspector Leo Logroño, team leader sa PIB nga target sa maong operasyon ang usa ka alyas “Ian” nga level 2 drug pusher sa Sitio Galaxy,Barangay Tangke.
Sumala pa ni Logroño nga ang maong pangalan migawas human sa ilang operasyon sa dakbayan sa Toledo.
Apan sa pag-abot pa lang sa mga polis niikyas dayon si Ian kay adunay misinggit “naa’y polis!” ug nabulabog ang operasyon.
Duha ka mga balay ang gisulod sa taga PIB diin nadakpan sila si Remedios Cabardo ug Carla Bazar nga gituohang kauban ni Ian sa iyang ilegal nga negosyo.
Nakuha sa kapulisan gikan sa mga dinakpan ang duha ka dagkong putos, lima ka medium size, 350 ka mga gagmay nga pakete diin kini mitimbang og 105 gramos nga mokantidad og kapin P1.2 milyon.
Sunod nga gihamagan sa kapulisan ang duha ka drug dens sa Sitio Kilawan sa mao gihapong barangay nga miresulta sa pagkasikop sa 22 ka tawo diin ang kinatiguwangan nag-edad og 50-anyos ug 20-anyos ang kinabataan nga giingong nanuyop.
Gawas kanila, nasakmit usab sa kapulisan ang tulo ka video karera ug usa ka moli-moli nga matud pang Logroño plantalya lang sa maong dapit kay sa likod niini nahimutang ang suyopanan.
Karong adlawa gikatakdang pasakaan og kaso ang 24 ka mga dinakpan lakip na si alyas Ian. – /EIM) (BANAT NEWS)