CEBU, Philippines – Mga hepe sa provincial ug district hospitals sa probinsiya mihangyo sa mga opisyal sa Kapitolyo nga dili langayon ang ilang sweldo.
Kini maoy ilang gipaabot atol sa budget hearing niadtong Huwebes human nanambong ang mga doktor nga chiefs of hospitals sa probinsiya.
Giingong usa sa makalangan sa ilang sweldo mao ang pagsumitir sa mga dokumento sama sa ilang daily time record (DTR) ug biometrics gikan sa tambalanan paingon ngadto sa Kapitolyo.
Ilang hangyo nga unta anha na lang sa buhatan sa hospitals makuha nila ang ilang sweldo ug dili na sila maoy moadto pa sa Kapitolyo aron mokubra niini.
Gikataho nga usahay mokapin sa buwan una pa makadawat sa ilang sweldo ang mga kawani sa mga hospital sa probinsiya.
Si Gob. Hilario Davide III mimando sa hepe sa Provincial Health Office (PHO) nga si Dr. Cynthia Genosolango nga hatagan og pagtagad ang maong problema.
Giingong usa sa hinungdan nga dili maka-hire og job orders ang mga hospital sa probinsiya tungod sa kalangan sa sweldo. (BANAT NEWS)