CEBU, Philippines - Mga estudyante nihangop nga aduna nay mas moderno ug hamugaway nga matang sa transportasyon nga alang kanila makabarato sila sa pletihan ug way hasol.
Hinuon gipaabot pa kun hatagan o dili og prangkisa ang Metro Rapid Transit Services Inc. kinsa maoy operator sa My Bus human naaprubahan sa Land Transportation Franchising and Regulatory Board(LTFRB) sa kaulohan niadtong Lunes ang pletihan niini.
Ang Regional Director sa LTFRB Central Visayas Reynaldo Elnar, di pa makahatag og tukma nga petsa kun kanus-a makaluwat ang LTFRB Board sa desisyon sa prangkisa niini.
Matud niya, gipaabot pa ang tubag sa MRTSI sa komento sa mga transport operators nga supak sa maong prangkisa.
Nasayran nga giaprubahan ang pletihan gikan sa Siyudad sa Talisay paingon sa Mactan Cebu International Airport anaa sa P75 ; P25 ang gikan sa Talisay paingon sa Barangay Mambaling ug P40 gikan sa Talisay paingon sa Parkmall o North Bus Terminal sa Mandaue City.
Usa ka tinun-an sa usa sa mga unibersidad sa Sugbo nga si Kristine Caballes, nga taga Punta Princesa, Dakbayan sa Sugbo miasoy nga affordable ra ang maong pletehan unya hamugaway ang biyahe ug mas barato kini og plete itandi kun mosakay og taksi padung sa tugpahanan.
Mao usab kini ang panglantaw ni Jasmin Alicaya, tinun-an gihapon sa kolehiyo kinsa nagpuyo sa Laray, Inayawan sa Dakbayan sa Talisay. Matud niya, bahala na lang ang deperensya sa plete sa jeepney ug sa MyBus ang importante hamugaway ang biyahe ug wala’y samok. Apan giklaro sa pangulo sa Cebu South Mini Bus Operators, Association Julie Flores, dili sila supak sa pletihan apan sa prangkisa lang. Dugang ni Flores, nadawat niya sa miaging semana ang komento sa MRTSI ug ang iyang abogado na ang gitahasan sa pagtubag niini. (BANAT NEWS)