CEBU, Philippines – Dili mominus sa gatusan ka tinun-an sa Southwestern University School of Medicine ang nag-rally atubangan sa buhatan sa Commission on Higher Education-7.
Lakip ang mga langyaw nga tinun-an sa tunghaan ang nisalmot sa rally diin ila’ng gipaabot ang pagkadismaya sanglit hangtud karon wala pa gisunod sa CHED-7 ang mando sa uluhang buhatan sa pagtabang sa apektado’ng mga tinun-an. Gimando sa CHED central office nga maka-graduate ra ang mga tinun-an sa SWU-School of Medicine ug makakuha sa ila’ng Doctor of Medicine degrees.
Panawagan sa mga tinun-an nga i-issue na ang special order number alang sa mga ni-graduate kay gikinahanglan kini alang sa ilang pagkuha sa licensure examination, pagsuwat ngadto sa Faimer - World Medical School Directory aron i-recognized sila ug mamahimo’ng makakuha og foreign licensure exam.
Laing gikagul-an sa mga estudyante ang matud pa wala pagpakig-alayon sa CHED-7 sa Bureau of Immigration aron maka-renew sa student visa ang kapin usa ka gatos ka langyaw nga tinun-an.
Kadaghanan kanila nagbayad na og P50 mil pataas isip penalty kay wala ma-renew ang student visa.
Sagad sa mga langyaw nga tinun-an nagagikan sa Nigeria ug Iran.
Buot unta sa mga tinun-an nga makighinabi ni CHED-7 Director Dr. Freddie Bernal, o ni bisan kinsa nga mga representante sa ahensiya apan wala’y bisan usa ang niatubang kanila. – /GMR) (BANAT NEWS)