CEBU, Philippines – Mohatag og kahigayunan ang Commission on Elections niadto’ng dili kompleto ang biometrics nga makabotar sa eleksiyon sunod tuig mao’ng dili angay mabalaka.
Nasayran nga sa Sugbo, dul-an sa 8 mil ka botante ang natala sa ahensiya nga adunay incomplete biometrics.
Nagkanayon si Atty. Marco Lionel Castillano, Provincial Election Supervisor, nga dili sala sa botante kun wala maklaro ang pagkuha sa digital signature.
Base sa uwahi’ng datus sa Comelec sa Probinsiya sa Sugbo niadto’ng Oktubre 31, 7,939 ka botante ang kuwang og biometrics.
May 74,110 usab ka botante ang wala'y biometrics ug gihimug-atan ni Castillano nga dili na gyud sila makabotar kun deactivated na ang ila’ng rehistrasyon. Aron mahibaw-an kun nalakip ang botante sa incomplete bio mahimo’ng susihon sa website sa Comelec ang www.comelec.gov.ph.
Gisugdan sa Election Registration Board niadto’ng Lunes ang pag-evaluate sa tanang botante ingon man impormasyon sa tanang rehistrante.
Sigun pa sa Assistant Regional Director sa Comelec-7, Atty. Veronico Petalcorin, nga posible’ng mapun-an pa ang 2,689,717 ka botante sa Sugbo human unya sa ERB evaluation nga mahibaw-an sunod semana.
Matud ni Castillano nga nakadawat na sila niadto’ng Sabado og lista sa subsequent double o multiple registrants.
Giklaro sa ahensiya nga kadto’ng una nga rehistro nila ang matuman. – /GMR) (BANAT NEWS)