CEBU, Philippines – Imbestigaron sa hunta probinsiyal sa Sugbo ang reklamo ni Konsehal Rodrigo Sinoy sa Tabogon batok ni Mayor Zigfred Duterte.
Duha ka kaso’ng grave abuse of authority, misconduct in office ug dereliction of duty ang atubangon sa mayor.
Si Sinoy nipasangil kang Duterte nga nitugot sa usa ka quarry operation sa Barangay Kal-anan ug Combado, ug reclamation project sa Barangay Tapul nga wala’y permit sa Provincial Environment and Natural Resources Office ingon man wala’y public consultation.
Lakip sa gikwestiyon ang giingong pagpagamit sa heavy equipments sa munisipyo sa paghakot sa mga materyales.
Gikahibulong ni Sinoy nga mga job order sa munisipyo ang gipatrabaho sa mayor sa pagpanguha og bas gikan sa Barangay Daan-Tabogon gamit ang tractor sa Department of Agriculture.
Nalakip sa reklamo ang pagtukod og wet and dry market sa Barangay Ilihan sa kantidad nga P3.2 milyones nga wala’y authority gikan sa konseho sa lungsod.
Matud ni Sinoy nga giimbitar na sa konseho ang contractor sa merkado aron paghatag og katin-awan sa proyekto apan wala kini nitunga sa sesyon.
Ang committee on complaints and investigation sa hunta probinsyal nga karon gipangulohan ni Bokal Grecilda Sanchez-Zaballero ang moimbestigar sa kaso. – /GMR) (BANAT NEWS)