IEC 2016 pilgrim symbol nabalik na sa Cebu

CEBU, Philippines – Gatusan ka Sugbuanon ang nidawat sa International Eucharistic Congress (IEC) 2016 Pilgrim Symbol nga niabot kagahapon sa buntag sa simbahan sa Birhen sa Regla sa Lapu-Lapu City gikan sa iya’ng biyahe sa 80 ka Archdioceses, Dioceses ug Vicariates of Prelature tibuok Pilipinas.

Ang simbolo niabot sa Mactan Cebu International Airport alas 10 pasado sa buntag ug gidala kini sulod sa Mactan Benito Ebuen Airbase diin gimontar ang IEC Pilgrim Symbol sulod sa Our Lady of Peace and Good Voyage.

Gisunod dayon ang motorkada gikan sa Airbase padulong sa National Shrine of Our Lady of Rule kon Birhen sa Regla. Matud ni Gloria Sevilla sa Gloanse Handcrafted, maker-designer sa IEC2016 Pilgrim Symbol, nga daku kaayo nila’ng pasalamat nga ang ila’ng konsepto ang napili nga icon.

Sumala pa ni Sevilla, kauban ang iya’ng bana nga si Antonio, nga sa tanan nila’ng obra nga nahimo, ang IEC Pilgrim Symbol ang labing nindot ug daghan na kaayo’ng tawo ang nakayukbo.

Gibutyag ni Sevilla nga adunay replica nga ila’ng gihimo sa IEC Pilgrim Symbol tungod kay sayud siya nga maulanan ug mainitan ang simbolo sa iya’ng pagbiyahe bisan asa hinungdan nga naghimo sila aron adunay magamit kung maguba ang original.

Si Sevilla niawhag sa mga Sugbuanon nga dili magpakawala sa paglaum tungod kay saksi siya sa makanunayon nga pagdagayday sa grasya sa Ginoo ug nidapit sa mga nagpalayo sa Ginoo sa pagpaduol  pagbalik.

Ang chairman sa IEC 2016 Pilgrim Symbol, Fr. Daniel Mata, mapasalamaton nga malampuson ang pagduaw sa IEC Pilgrim Symbol sa tibuok lugar sa Pilipinas nga gisugdan niadto’ng Enero 25 sa Diocese sa Dumaguete ug gitak-upan niadto’ng Nobiyembre 10 sa Jolo, Sulu.

Malaumon si Mata nga adunay daku nga partisipasyon ang mga layko ug kaparian atol sa kalihukan sa Enero 24-31, 2016.  (BANAT NEWS)

Show comments