CEBU, Philippines - Gisugdan na kagahapon ang nobenaryo sa tinuig nga kapistahan sa Birhen sa Regla sa dakbayan sa Lapu-Lapu karong Nobiyembre 20 ug 21 pinaagi sa fluvial procession.
Gikan sa baybayon sa Pacific Cebu Resort sa Barangay Subabasbas sa alas 7 sa buntag, giprosesyon ang imahe sa mga coastal barangay sa Marigondon, Agus, Maribago, Mactan ug Punta Engaño dayun sa Ibo ug Pusok ug nidunggo sa Muelle Osmeña pasado alas 9 sa buntag diin gisugat sa gibana-bana 3,000 ka deboto.
Si Mayor Paz Radaza, mga anak nga sila si Kongresista Aileen Radaza ug Konsehal Harry Radaza, ug Bise Mayor Marcial Ycong ang nidala sa andas paingon sa simbahan sa Birhen sa Regla.
Katunga sa konseho sa dakbayan ang nisugat usab sa imahe samtang liboan ang nanambong sa misa.
Sa laing bahin, si Konsehal Jose Dungog, presidente sa Association of Barangay Councils sa dakbayan, nagkanayon nga ipahigayon nila ang Garbo sa Lapu-Lapu Festival karong Nobiyembre 18.
Kini langkuban sa street dancing, float, higante, Search for Festival Dancing Queen ug Pasahalad. Ang 30 ka barangay sa siyudad ang magtigi sa kompetisyon, matud ni Dungog.
Dugang niini, ang mao’ng adlaw ideklarar usab isip “Youth Day sa Lapu-Lapu” human giaprobahan sa konseho ang resolusyon niadto’ng Miyerkules. (BANAT NEWS)