CEBU, Philippines - Mosusi ang Department of Social Welfare and Development sa mga biktima sa bagyo’ng Yolanda gikan sa pipila ka bahin sa Rehiyon 8 nga nia sa Sugbo aron masayran kung unsa na ang kahimtang human sa duha na ka tuig.
Matud ni DSWD-7 Information Officer Leah Quintana wala sila’y lista kung pila ka survivors gikan sa Leyte ang nia pa sa Sugbo tungod kay ang uban adto na man deretso magpalista sa City or Municipal Social Welfare Office kung asa sila dapita nagpuyo sa Sugbo. Sumala pa ni Quintana nga upat lang ka pamilya gikan sa Rehiyon 8 nga survivors sa bagyo’ng Yolanda ang niapil sa ila’ng Sustainable Livelihood Program nga nakadawat og tag P10 mil.
Giawhag ni Quintana ang mga survivors sa Yolanda nga gikan sa bisan asa nga lugar sa Rehiyon 8 nga wala makadawat og ayuda sa pagdangop sa mga local government units diin sila nahisakop o kaha sa buhatan sa DSWD-7 aron ila’ng masayran ang mga tabang nga ila’ng gikinahanglan. (Rowena D. Capistrano/GMR)(BANAT NEWS)