CEBU, Philippines - Nalandig sa tambalanan ang usa ka polis human kini natagak sa pangpang samtang nakiglayog kini sa dakpunon nilang notadong drug pusher diha sa barangay Tutay sa lungsod sa Pinamungajan.
Ang nalandig sa tambalanan mao si Police Officer 2 Jerame Navarro nga nagsilbing “perimeter guard” atol sa pagpatuman ug search warrant sa kapulisan batok ni Alexander Papasin, nga anaa sa “top ten list” sa drug personalities sa maong lungsod. Apan tulo usab ang nadakpan nga sila si Jovany Papasin, 21, Joey Papasin, ug Warren Rezane, 24 , pulos nakuhaan og mga pinaketeng gituohang shabu. Matud pa ni Senior Inspector Al Pascual, hepe sa Pinamungajan Police , pagsulod nila sa lugar didto diay sulod sa banyo ang suspetsado ug nakabantay kini kanila ug misutoy og dagan.
Si PO2 Navarro nga nagbantay sa gawas mao’y nilayog sa suspetsado apan natagak si Navarro samtang nakaikyas ang suspek.
Sulod sa lawak sa suspetsado narekober sa mga polis ang duha ka dagko nga putos sa gituohang shabu, usa ka .45 caliber pistol ug usa ka .38 snub nose revolver. Sa laing bahin, tulo ka tawo diin usa niini babaye ang nadakpan atol sa drug raid sa kapulisan sa dakbayan sa Lapu-Lapu sa sitio Simplex, Marigondon.
Ang mga dinakpan mao sila si Joraldine Igot, 34, kapuyo niini nga si Concepcion Damon-Damon, 20, ug usa ka Ray Pogoy, 46, nakuhaan og upat ka medium size, duha ka gagmay’ng pakete sa gituohang shabu, usa ka .38 nga revolver nga dunay upat ka bala. Si Damon-Damon, nakuhaan og P400 nga buy-bust money samtang si Pogoy nakuhaan og P500 nga giingong halin sa pagpamaligya og ginadiling drugas. (Jojo Ugdol ug Decemay P. Padilla/EIM)
Andam na sa transport strike
Giandam na sa siyudad sa Sugbo ang 25 ka mga Kaoshiung buses aron gamiton paghakot sa mga tawo nga matanggong sa karsada kun ipadayon sa transport groups ang ilang bahad nga strike ugmang adlawa. Matud pa ni Konsehal Dave Tumulak, pangulo sa Cebu City Disaster Risk Reduction and Management Council, preparado na sila kung padayonon sa mga driver ug operators ang ilang bahad. Sumala pa ni Tumulak, girespeto nila ang baruganan sa mga drayber apan matud pa niya dili sila uyon nga isakripisyo sa maong pundok ang mga sumasakay ilabi na ang mga estudyante ug ang mga trabahante. Dugang pa ni Tumulak, kung makita nila nga kulang ang mga sakyanan ilang padaganon ang mga buses sa north, south ug central sa dakbayan nga pakuyogan og polis.
Kahinumdoman nga mipadayag ang mga transport operators sa Sugbo sa planong pagbutang og dugang rota gikan sa dakbayan sa Talisay padung ngadto sa Lapu-Lapu City nga diha moagi sa South Road Properties nga gamitan sa mas moderno ug mas luwas nga transport system nga “My Bus.”
Ang mga drayber nabalaka nga makulban sila og kaldero tungod niini. (Rowena D. Capistrano/EIM)(BANAT NEWS)