CEBU, Philippines - Gipaabot pa sa Lapu-Lapu City Police Office- Traffic Division ang kampo ni kanhi Cebu City congressman Tomas Osmeña nga makahatag sa ilahang habig kabahin sa nahitabong aksidente sa miaging Sabado sa gabii diha sa sitio Saac 1, barangay Buaya sa dakbayan sa Lapu-Lapu nga miresulta sa kamatayon sa usa ka babaye.
Si Police Officer 1 Jennifer Decatoria nagkanayon sa Banat News nga sad-an usab ang driver ni Osmeña human nalagpot kanila ang biktima nga si Fe Casallas, 35, human kini ug ang gisakyang motor nasaghiran sa drayber nga si Danny Igot, 45. “Ang driver sa sakyanan ang sad-an, kay naigo man nila, gawas sa laing motor nga nakabangga sa gisakyan nga motor sa biktima ug sa iyahang bana,” matud ni Decatoria.
Dugang ni Decatoria, posibleng mapasakaan usab og kaso si Igot ang drayber sa motor nga unang nakaigo sa magtiayong Casallas.
Kasong reckless driving resulting in homicide, serious physical injuries and damage to property ang mapasaka kung ang pamilya sa biktima gustong mopadayon niini.
Sa alas-10 sa gabii sa miaging Sabado, luwan sa motor ang magtiayong Fe ug Wilson Casallas, 33, paingon sa barangay Buaya sa dihang mi-overtake ang laing motor gimaneho ni Igot apan nasaghiran niini ang managtiayon ug nalagpot si Fe paingon sa sakyanan ni Osmeña ug naigo usab kini niini.
Si Decatoria midugang nga gikan nanihapon sa Shangri-la’s Mactan Resort and Spa si Osmeña ug aduna kini convoy nga laing sakyanan diin nahimutang si Cebu City Councilor Margot Osmeña.
Gidala si Fe sa Mactan Doctor’s Hospital apan gideklarar kini nga patay samtang ang bana niini nga si Wilson ug si Igot gidala sa Vicente Sotto Memorial Medical Center. Mipadayag hinuon si City Councilor Margarita “Margot” Osmeña nga andam silang mohatag og financial assistance sa babaye nga namatay.
Matud ni Margot nga wala pay mipatawag sa ilang driver human sa aksidente ug kun ipatawag man kini, willing silang mopatim-aw ngadto sa kapolisan.
Matud niya nga iyang sakyanan nagsunod sa sakyanan sa iyang bana padulong uli sa siyudad gikan sa anniversary party sa suod nilang higala. Sigon niya nga ang iyang driver nakakita nga adunay ni-overtake sa sakyanan sa kanhi mayor ug nagbangga kini sa pikas nga nag-motorsiklo sab.
Ug nakita nila ang babaye sa usa ka motorsiklo nalagpot ug nitugpa sa atubangan sa sakyanan sa kanhi mayor ug naligsan kini.
Matud ni Margot nga minghawa na sila sa lugar human naabot ang mga emergency medical service (ERUF) tungod kahibaw sila nga walay sala ang driver sa kanhi mayor.
Apan, dugang ni Margot nga willing silang mopakita ug motubag sa mga pangutana sa kapolisan kun ipatawag sila. (Christell Fatima Tudtud ug Jean Demecillo/EIM)(BANAT NEWS)