CEBU, Philippines – Tungod sa pagduda nga adunay laing gikabuangan nga laing lalaki ang iyang asawa, gipusil sa usa ka bana ang iyang asawa samtang kini nagtrabaho isip tindera sa usa ka burgeran diha sa barangay Poblacion, dakbayan sa Talisay.
Ang biktima nailhan nga si Roxan Babano, 33, taga sitio Libo, barangay Mohon sa maong dakbayan. Samtang gipangita pa karon ang iyang bana nga si Arnold Babano, 34.
Si Police Officer 3 Oliver Ortega, imbestigador sa Talisay City Police Station nagkanayon nga on-duty si Roxan niadtong tungora dihang naabot ang iyang bana ug way daghang pangutana gidireto pagpusil ang ginang.
Naigo si Roxan sa ubos nga bahin sa wala nga dughan hinungdan sa iyang pagkahagba.
Ang biktima gidala sa Talisay City District Hospital ug gibalhin sa Vicente Sotto Memorial Medical Center sa dakbayan sa Sugbo tungod sa katalandugon sa kahimtang niini.
Narekober sa kapulisan sa crime scene ang usa ka lead sa bala nga gituohang gikan sa usa ka .38 nga revolver.
Matud pa ni Ortega nagsige na og away ang magtiayon tungod sa pagduda sa suspetsado nga adunay laing karelasyon ang iyang asawa.
"Pirme gyud nga mag-away ang managtiayon kay lagi ang bana masuko nga tagdugay na kaayo mouli sa ilang balay ang biktima," nagkanayon si Ortega.
Sa laing bahin, gumikan sa selos nadunggaban og nail cutter sa usa ka Eliseo Amatiaga, 41, ang kainom niining si Christopher Dollisen tungod sa pagselos sa suspek kay nakig-estorya iyang asawa sa biktima.
Ang insidente nahitabo sa sitio Campalad, barangay Nug-as lungsod sa Alcoy samtang ang suspek ug ang biktima kauban sa ilang mga barkada nagbinuntagay og inom.
Matud pa ni Police Officer 3 Rosendo Binondo ang desk officer sa Alcoy Police nga nahinabi sa Banat News kini miingon nga unang nananghid ang biktima nga mopauli kay matulog.
Paglabay sa pipila ka minutos, nilakaw ang suspek kay mopalit og sigarilyo apan mao nalay iyang nalabyan ang biktima ug ang iyang asawa nag-estoryahanay ug sa kapungot sa suspek gidunggab niya sa gamay nga kutsilyo sa nail cutter ang bukobuko sa biktima.
Ang biktima nagpatabang sa kapolisan hinungdan sa pagkasikop sa suspek diha sa ilang balay. –
EIM) (BANAT NEWS)