CEBU, Philippines – Adunay himuong kalihokan sa Tacloban City alang sa ikaduhang anibersaryo sa trahedya sa Yolanda karong adlawa, apan hangtud ning pagbalita wala pay kasigurohan kun adunay mga kadagkoan sa Malacañang ang motambong.
Adunay 50 mil ka mga kandila ang dagkotan karong adlawa sa nagkadaiyang mass graves diha sa Tacloban ug kalungsoran sa Dulag, Tanauan, Tolosa ug Palo.
Usa ka Santos nga Misa usab ang himuon sa barangay Anibong sa Tacloban atol sa pagbukas sa memorial marker, ang unahang bahin sa M/V Eve Jocelyn, ang barko nga nasangad sa baybayon sa maong barangay atol sa pag-igo sa Yolanda.
Ang maong bahin sa barko gibaligya sa Philippine Precious Metal Resources sa dakbayan sa Tacloban sa kantidad nga P120 mil ug gigastohan og P2 milyones aron himuong landmark isip handumanan kun unsa kadako ang kadaot nga gibilin sa maong bagyo sa ilang siyudad.
Ang siyudad gikatahong miimbitar kang Presidente Benigno Aquino III ug uban pang mga opisyales sa Malacañang apan hangtud kagahapon, walay nadawat nga impormasyon ang dakbayan kun motambong ba ang pangulo o si bisan kinsang opisyal sa Palasyo.
Si Secretary Edwin Lacierda gikatahong moabot unta kagahapon apan wala kini mobutho ug wa say eksplinasyon kun ngano.
Samtang si DILG Secretary Mel Senen Sarmiento, kinsa usa ka Samarnon, niabot sa Tacloban niadtong miaging adlaw apan kutob ra siya sa airport diin nakigkita siya sa mga opisyales sa kapolisan aron pag turnover sa 40 patrol cars.
Miadto kini dayon sa Biliran City luwan sa usa ka helicopter aron usab ihatag ang walo ka susamang patrol cars sa probinsya ug pagkahuman milahos sa Southern Leyte alang gihapon sa maong kalihokan. Wala hinuon mokomento ang mga opisyales sa Tacloban City kun nganong walay opisyales sa administrasyon nga nakigkita kanila.
Matud pa nga ang mga embahada sa Japan, US ug international non-government organizations ug local non-government organizations mikompirmar nga mopadala og representante.
Apan si Vice President Jojo Binay, kinsa modagan pagka presidente sa sunod tuig kauban sa iyang senatorial lineup miadto sa Tolosa, Leyte ug didto namulong bahin sa matud pa paglutos kaniya sa Aquino administration, apan wala siya maghisgot kabahin sa trahedya sa Yolanda, gawas lang sa pag-awhag sa mga Tolosanon nga sila nay mohukom sa 2016 Elections.
Liboan ka mga survivors sa Yolanda ang naghinay-hinay na og dugok sa mass grave site sa Barangay Basper diin gilubong ang liboan ka wala mailhing mga lawas nga nakalas niadtong Nobiyembre 8, 2013.
Si Tacloban Mayor Alfred Romualdez malaumon ug nalipay sa kapaspas nga pagbangon sa iyang siyudad sud lang sa duha ka tuig.
“You can’t imagine how much the metropolis had risen and progressed after two years,” apan naguol siya tungod kay kadtong wala pa mahatagi og permanenteng mga balay namalik og tukod diha sa danger zones.
Sa pagkakaron, aduna pay dul-an 1,000 ka pamilya nga nagpuyo sa bunkhouses samtang 800 ka pamilya pa lang ang nabalhin sa permanenteng balay. Adunay 15,731 housing units ang giplanohang tukoron sa Cit Housing Community Development pinaagi sa National Housing Authority.
Si Rowena Dilario, 39, kinsa namatyan sa iyang bana ug duha ka mga anak atol sa trahedya pabiling nagpuyo karon sa temporary shelter. Nabalaka siya matag-karon ug unya tungod sa ilang kahimtang ug kun kanus-a siya mahatagan og mas luwas nga kapuy-an sa gobiyerno.
Si Leyte Governor Dominic Petilla, mihulagway sa pagtimaan sa anibersaryo sa Yolanda karong tuiga nga simple apan mabulokon.
"Let us set aside Yolanda ... and move on by making Yolanda a lesson to be a better person and community," matud pa sa iyang mensahe. (BANAT NEWS)