CEBU, Philippines - Gipasakaan og kasong criminal sa Ombudsman-Visayas ang usa ka opisyal sa Department of Public Works and Highways (DPWH) 7 kalabot sa kontrobersiyal nga gipamalit nga 300 lampposts atol sa Association of Southeast Asian Nations (ASEAN) Summit dinhi sa Sugbo siyam ka tuig na ang nakalabay.
Ang Office of the Ombudsman—Visayas mipasaka og kasong paglapas sa Republic Act 3019 o Anti-Graft and Corrupt Practices Act batok kang Engineer III Leah Negre, ang chairman sa DPWH Regional Estimating Committee, diha sa Regional Trial Court.
Si graft investigation and prosecution officer Eileen Mae Lagat-Alde nakakita og ebidensya nga nagtumbok kang Negre nga maoy miaprubar sa P25 milyones nga budget alang sa pagpalit sa 300 ka lampposts nga gihulagway nga “excessively overpriced” kun itandi sa gihimong pakisusi sa Ombudsman ug sa cost evaluations sa Commission on Audit.
“Clearly, Negre, being the chairman and part of the committee, failed to determine the proper costs of the materials through a market probe,” sumala pa sa 12 ka pahinang resolusyon sa Ombudsman.
Ang Ombudsman Public Assistance and Corruption Office maoy mipasaka sa kaso nga nag-akusar kanila ni Negre ug Ma. Sheila Uy, kanhi DPWH bids and award committee and technical working group head nga nakalapas ang duha sa anti-graft law.
Matud pa nga si Uy maoy mipreparar ug miduso sa post qualification report samtang si Negre maoy mipreparar ug miaprubar ug miduso sa giaprubahang budget alang sa kontrata bisan wala nila tan-awa og maayo ang presyo.
Si Negre kusganong nihimakak sa alegasyon nga siya maoy niduso sa approved budget alang sa kontrata nga wala niya tan-awa ang presyo. Matud niya mao pa kadto ang unang higayon nga naghimo og susamang proyekto ang DPWH ug nagbase lang siya sa program of works and estimates nga giduso sa Mandaue City Engineering Office nga giaprubahan usab sa ilang director.
Samtang gibasura ang kaso batok kang Uy tungod sa kakuwang sa ebidensya.(Edwin Ian Melecio gikan sa The Freeman)