CEBU, Philippines - Duha ka relocation sites nga nahimutang sa barangay Agujo ug Paypay nga gitukoran sa sobra sa 200 ka housing units ang gi-turnover kagahapon sa kagamhanan sa lungsod sa Daanbantayan ngadto sa mga beneficiary.
Si Mayor Augusto Corro nagkanayon nga ang unang relocation site nahimutang sa Agujo adunay gilapdon nga 5,444 square meters ug gitukoran og 76 ka units nga balay.
Ang matag balay dunay 22 square meters ang gilapdon niini, duplex type ug pwede nga mabutangan pa og extension sa ibabaw nga bahin.
Ang maong mga balay nga gitukod typhoon ug earthquake resilient kini matud ni Corro, o balay nga makasugakod sa linog ug uban pang katalagman.
Ang maong relocation site gihinganlan og French Village tungod kay ang nihatag og pundo sa pagtukod sa mga balay mao ang French-Philippines United Action kansang mga miyembro gikan sa French business community dinhi sa nasud. Ang maong proyekto gibana-banang mikabat ngadto sa $650,000 (USD).
Ang kagamhanan sa probinsiya maoy midonar sa lote nga gitukuran sa mga balay ug ang Habitat for Humanity maoy nag-implementar niini ug ang pundo nga gigamit sa pagtukod sa mga balay iya sa maong NGO.
Samtang sa barangay Paypay, gidonar sa igsuon ni Corro ang 1.4 ektaryang lote nga gitukoran sa 128 ka balay.
Ang maong proyekto gitukod sa Philippine National Red Cross apan ang pundo nagagikan sa French Red Cross.
Si Corro miingon nga adunay tubig, sementado ang dalan ug adunay 33 kilowatt solar power supply ang kabalayan diha sa relocation site sa barangay Paypay. Gikataho nga ang budget sa maong proyekto gibana-banang mikabat ngadto sa $1 million (USD).
Matud pa ni Corro igo ra sila nanglista sa mga pangalan sa benepisyaryo apan ang mipatuman sa proyekto maoy nihimo sa screening kun si kinsa kanila ang kwalipikado nga mahatagan sa balay. (Brenda D. Batuto/EIM)(BANAT NEWS)