CEBU, Philippines – Giawhag sa hunta probinsiyal sa Sugbo ang mga lokal nga kagamhanan sa pagtabang sa ilang mga konstituwente nga biktima sa taas kaayo nga tubo sa mga lending companies.
Si Bokal Arleigh Sitoy nagkanayon nga ang mga lending companies ug uban pa’ng nagpautang og kwarta giingong mopahimulos sa panginahanglan sa kwarta sa ubang tawo.
Matud ni Sitoy nga ang mga nanghuwam kinsa wala’y kalibutan sa ila’ng katungod pugson kini sa pagpabayad sa ila’ng huwam bisan sobra na kaayo ang ila’ng nabayad tungod sa kataas sa tubo.
Kasagaran sa mga mangutang magapos na sa utang tungod kay mangutang na man usab kini aron ibayad sa una’ng utang.
Kung makapalta sa pagbayad, laing tubo ang ipatong.
Si Sitoy nagkanayon nga isip tigpanalipod sa katungod sa mga konstituwente, ang mga LGUs giawhag sa pagtabang bahin sa mao’ng problema.
Ang mga LGUs giawhag usab sa pagpanday og balaud batok sa mga mapahimuslanon nga tigpatanto. (BANAT NEWS)