CEBU, Philippines – Naabtan og duha ka adlaw si Tereso Gedorio, 37, tricycle driver nga nagpuyo sa barangay Mactan, dakbayan sa Lapu-Lapu una pa narehistro sa buhatan sa Commission on Elections.
Alas 9 kagahapon sa buntag nahuman si Gedorio sa pagproseso sa pagpahulagway.
"Nianhi ko dinhi pag Biyernes sa alas 4 sa buntag, pero niuli ko mga alas 7 sa gabii. Niuli dayon ko kay daghan kaayo’ng tawo," matud ni Gedorio.
Samtang si Jason Igot, 23, salesman sa usa ka guitar shop ug residente sa barangay Pajac, niapil sa taas nga linya tungod kagahapon ra siya nakalugar.
"Karon ra ko nakalugar kay day-off. Nya atoa baya ni’ng katungod nga mobotar,” matud ni Igot.
Sa katapusang adlaw sa pagpangrehistro alang sa 2016 elections kagahapon, nagkanayon si City Election Officer Jannette Hu-Lamban nga daghan ang nidagsa sa satellite registration sa Gaisano Grandmall sa Marigondon.
Anaa sa 300 ka tawo ang gibanabana nga nagparehistro kagahapon matud ni Lamban.
Matud ni Lamban nga tungod kay nag-agad sila sa mall hours nga magsugod sa alas 9 sa buntag hangtud alas 8:30 sa gabii, posible’ng ma cut-off ang pagproseso sa rehistro.
Tambag ni Lamban nga angay gyud ang mga residente nga mosayo og parehistro sa mosunod nga registration kay sa niagi’ng tuig pa abli ang pagpangrehistro sa ila’ng opisina. (BANAT NEWS)