CEBU, Philippines - Daghang mga kahugpongan sa mga mananagat sa Pilipinas , lokal nga kagamhanan ug non-governmental organizations ang malaumon nga makabawi ang kadagatan gikan sa kadaot nga nahiaguman niini sa nangaging mga dekada gikan sa overfishing ug makadaot nga pamaagi sa panagat.
Misalig sila nga adunay kausaban ug dakong kalamboan nga mahitabo sa pag-amendar sa Republic Act 8550 nga mao ang Fishery Code of the Philippines of 1998 pinaagi sa RA 10654 .
Sa labing unang higayon, gihimo ang National Summit on Participatory Governance Towards Sustainable Fisheries nga gihimo sa Philippine International Convention Center(PICC) sa Pasay City.
Ang mga naghugpong nga NGOs nga gitawag og Katipunan mipadangat sa ilang suporta sa RA 10654. Sila gilangkoban sa Greenpeace, Pangisda, Haribon, Oceana, Pakisama, PKSK, ug mga sakop sa nagkadaiyang Fisheries and Aquatic Resources Management Councils (FARMCs) sa nasud.
Nagtuo sila nga ang nagpadayong pagtibugsok sa mga kabus nga mananagat epekto kini sa walay ngipon nga balaod, huyang nga pagdumala sa resources sa kadagatan.
Si Department of Agriculture Secretary Proceso Alcala Jr. miingon nga ang ilang gibuhat gikinahanglan aron masiguro nga adunay abundang pagkaon gikan sa kadagatan ang mosunod nga mga henerasyon.
Giawhag niya ang tanang sakop sa Philippine Committee Against Illegal, Unreported, and Unregulated (IUU) Fishing nga seryosuhon ang tagsa-tagsa nila ka mga tahas aron mapalambo ang sector sa panagat.
Sentro sa maong kalihokan ang paglusad sa “Isang Bangka”nga nagpakita sa hiniusang aksyon sa tanang sector nga nalambigit sa pangisda ug ang 25-minutos nga Isang Bangka: Ulat-Dokyumentaryo Ukol sa Balikatang Pangangasiwa Tungo sa mas Masaganang Pangisdaan.
“Aside from the efforts from national agencies, Isang Bangka also features initiatives by the local government units and the fishery stakeholders, which is an example of an effective collaborative framework,” matud pa ni DA Undersecretary for Fisheries ug BFAR national director Asis G. Perez.
Ang BFAR gikatakda na unyang mopatuman sa mga bag-ong reporma sa mga polisiya aron maalkontrahan ang IUU fishing sa nasud sama na lang sa paghulma sa Implementing Rules and Regulations sa RA 10654 nga nag-amendar sa RA 8550. Ang RA 10654 mas bug-at og silot itandi sa RA 8550 nga gituyo aron magduhaduha na ang mga ilegalista paggamit sa makadaot nga matang sa pagpanagat. (Edwin Ian Melecio)(BANAT NEWS)