CEBU, Philippines – Susihon sa Integrated Provincial Health Office nga gipangulohan ni Dr. Cynthia Genesolango ang nasinati’ng sakit sa pipila ka residente sa Valencia, dakbayan sa Carcar nga giingong dala sa haze.
Matud ni Genesolango nga laraw karon sa probinsya nga mopalit og duha ka Environmental Beta Attenuation Monitor (E-BAM) nga balor og P1.6 milyones matag usa aron ibutang sa amihanan ug habagatan sa Sugbo nga mag-monitor sa abog.
Gibutyag ni Genesolango nga nakapirma na siya og emergency purchase request sa pagpalit og N95 mask nga ipangapod-apod sa 16 ka district hospitals, sa mga empleyado sa Kapitolyo ug sa mga Rural Health Unit.
Matud ni Genesolango nga nakig-layon na sila sa City Health Office sa Carcar aron pagtino kun unsa ka tinuod ang report.
Usa ka text message ang nadawat sa Environmental Management Bureau labot sa pagsakit sa mata ug paglisud og ginhawa sa mga residente sa mao’ng lugar.
Gitambagan ni EMB-7 Director William Cuñado nga mogamit lang una og basa nga panyo sa pagtabon sa ilong ug baba ilabi na niadto’ng dili makapalit og N95 dust mask.
Ang PAGASA pinaagi ni Engr. Al Quiblat nipahibawo nga dili na sa Sugbo paingon ang direksiyon sa hangin mao’ng dili na kaayo taas ang ‘smaze’ sa Sugbo.
Nasuta nga lakip ang isla sa Bantayan ang nakasinati usab niini sigun pa sa EMB-7.
Ang dakbayan sa Sugbo duna nay duha ka E-BAM. – /GMR) (BANAT NEWS)