CEBU, Philippines – Nasikop sa kapolisan ang usa ka Indian nga gialarma sa pagdala og armas kagahapon sa tunga’ng gabii sa dalan C. Padilla, Mambaling, dakbayan sa Sugbo.
Ang langyaw naila nga si Sandeep Kumar, 41, kasamtangang nagpuyo sa V. Rama, Calamba, dakbayan sa Sugbo. Ang tag-iya sa Bebot Silogan Food and Drinks nga si Bebot Legaspi nitawag sa buhatan sa kapolisan ug ni-report nga usa sa customer nagdala og armas.
Kini human iya’ng nakit-an nga ang Indian nagtakin og armas samtang padulong sa iya’ng sakyanan.
Matud pa nga medyo nagsusapinday na og lakaw ang langyaw tungod kay nakainom.
Ang mga sakop sa Special Weapon and Tactics (SWAT) ug operatiba sa Mambaling Police Station (Station 11) ang niresponde sa alarma.
Sa pag-abot sa mga sakop sa Station 11 ug sa SWAT, hinay sila’ng niduol sa sakyanan sa Indian ug didto nakita nila nga natulog kini sa sulod.
Gituktok sa kapolisan ug nagpaila sila nga polis ug ila’ng nakita nga ang kalibre .45 nga pistola sa langyaw didto gibutang sa lingkuranan kilid sa iya’ng paa.
Gipangitaan og papeles ang langyaw sa iya’ng paghupot sa pistola apan wala’y napakita hinungdan sa iya’ng pagkasikop. Gidala sa Mambaling Police Station ang langyaw ug pasakaan og kaso’ng kalapasan sa Comprehensive Firearms and Ammunition Regulation Act. – /GMR) (BANAT NEWS)