P1M shabu ug armas nasakmit

CEBU, Philippines – Human sa duha ka semana nga surveillance, balik na usab sa bilangguan ang usa ka level 2 drug pusher nga taga sitio Cahipa, barangay Hipodromo, dakbayan sa Sugbo human kini nadakpan sa gihimong buy-bust operation sa City Intelligence Branch (CIB) sa Cebu City Police Office (CCPO) kagahapon sa udto.

Ang subject sa buy- bust operation  mao si Jonathan Estrera, 37, nga nasikop na usab kaniadto sa Regional Anti-Illegal Drugs Special Operations Task Group-7  niadtong tuig 2010 tungod gihapon sa illegal nga drugas apan nakagawas sa prisuhan niadto lang miaging tuig.

Matud ni Superintendent Romeo Santander, pangulo sa CIB-CCPO, si Estrera mao karon ang nag-unang supplier sa illegal nga drugas sa maong barangay.

Dugang ni Santander, dili lang sa Hipodromo naglihok ang dinakpan apan lakip na usab didto sa barangay Lorega-San Miguel, Carreta ug Mabolo. Atol sa operasyon nakuha ang tulo ka armas, drug paraphernalia ug ang 85 gramos nga gituohang shabu nga nagkantidad og dul-an P1 milyon.

Lakip sa nasikop mao si Roger Ybañez, 32, usa ka ex-convict ug giingong kini maoy responsable sa sunod-sunod sa pagpanulis sa mga call centers sa barangay Mabolo kinsa bag-o lang usab nakagawas sa prisuhan niadtong Pebrero ning tuiga.

Samtang laing tulo  ang gidakop sa mga otoridad human maaktuhan nga nag pot session.

Ang dinakpan nga  Estrera  mihimakak nga iya ang maong mga ilegal nga drugas ug di tinuod nga namaligya siya niini.

Samtang nadakpan ang managkapuyo sa buy- bust operation diha sa Barientos Compound sa Tabok, Mandaue City.

Nakuhaan og siyam ka paketeng shabu, drug paraphernalia ug duha ka armas sila si Ritchie Sultan Lucernas, 30, ug kapuyo nga si Mary Jean Allegado, 19, pulos taga La Libertad, Negros Oriental.

Nakuha usab kanila ang kalibre .38 nga armas ug kalibre .22 nga pulos puno sa mga bala ug drug paraphernalia. (/EIM) (BANAT NEWS)

 

Show comments