CEBU, Philippines – Si Konsehal Gerardo Carillo gusto g’yud nga tukion sa Cebu City Council ang Supplemental Budget No. 1 ug sutaon kun unsa ang gastohan sa kapin P2.8 Bilyones nga gigahinan sa mao nga budget. Ang iyang pamahayag giluwatan human nga nabutyag nga ang Knockbox Pizzeria nga gipanag-iya sa inahan sa iyang uyab apil diay sa gigahinan og P99,200 sa Supplemental Budget.
Si Konsehal Alvin Dizon nga alyado sa Bando Osmeña Pundok-Kauswagan (BOPK) maoy mibutyag niining mao nga kasayuran ug misaway sa kauban niya nga konsehal.
Apan si Carillo mitataw nga ang inahan sa iyang uyab dugay na nga nahimong supplier og mga pagkaon sa mga kalihukan sa City Hall.
Ang P99,200 maoy bayad sa pagkaon nga nagamit sa pagpahigayon sa Rakrakan sa Sugbo, usa ka indigay sa banda nga gisalmotan sa mga batan-on sa kabarangayan.
Matud ni Carillo nga gusto niya nga tagsa-tagsahon pagtuki sa konseho ang gisugyot nga gastohan. Ang konseho wala usa motuki sa gisugyot nga budget tungod sa kaso nga gipasaka ni Romulo Torres.
Gikiha ni Torres ang mga konsehal tungod sa pagtugot nila nga ang 45 hektareyas nga kayutaan sa South Road Properties mabaligya pinaagi sa public bidding ug dili pinaagi sa Unsolicited Proposal nga maoy gilatid sa ordinansa.
Karong Miyerkules, ang mga konsehal mihukom kun ila ba nga aprobahan ang gisugyot nga supplemental budget o kaha ibalik kini ngadto sa mayor aron pangitaan og lain nga “source of funds.” (/RUB) (BANAT NEWS)